Greining Ársreikninga II

Þetta námskeið er framhald af Greiningu ársreikninga I og fer dýpra í lesturinn með raunverulegum ársreikningi Ölgerðarinnar Egils Skallagrímssonar hf. sem dæmi allan tímann. Hér er ekki unnið með tilbúin dæmi heldur skráð félag á Nasdaq Iceland, eins og það birtist markaðnum.

Farið er yfir eftirfarandi:

Skýrsla stjórnar og forstjóra: hvað stjórnendur segja sjálfir um reksturinn, hvaða atburði ársins þeir draga fram og hvernig lesa má það sem stendur á milli línanna.

Áritun endurskoðanda: hvað felst í áliti endurskoðanda, hvað lykilatriði endurskoðunarinnar segja um það hvar mesta óvissan liggur, og af hverju skýrsla stjórnar er undanskilin endurskoðun.

Samspil reikninganna við skýringar: hvernig rekstrarreikningur, efnahagsreikningur og sjóðstreymi tengjast innbyrðis og hvernig skýringarnar aftast í ársreikningnum útskýra tölurnar framar í honum. Þar liggur oft það sem skiptir mestu máli.

Tengingin við markaðsvirði: hvernig verð á hlut Ölgerðarinnar tengist ársreikningnum, hvernig V/H hlutfall er reiknað og af hverju markaðurinn horfir frekar á væntan hagnað en liðinn.

Að loknu námskeiði getur þú lesið ársreikning skráðs félags í heild sinni, ekki bara einstakar tölur, og áttað þig á því hvernig upplýsingarnar í honum mynda grunn að mati á stöðu félagsins og þróun þess næstu misseri.

Námskeiðið gerir ráð fyrir grunnþekkingu á uppbyggingu ársreiknings, til dæmis af Greiningu ársreikninga I.

Lengd námskeiðs: 1 klst.

Kennari: Haukur Skúlason, meðstofnandi indó