Excel II: Fyrir Lengra Komna

Algengur misskilningur er að því betri sem maður verður í Excel, því flóknari verði formúlurnar. Þau sem best kunna á forritið gera einmitt hið gagnstæða: þau ákveða í upphafi hvernig endanleg afurð á að líta út og halda skjalinu eins einföldu og læsilegu og hægt er. Þetta námskeið byggir á þeirri hugsun og fer í þau atriði sem koma upp þegar Excel er notað í raunverulegri vinnu.

Farið er yfir eftirfarandi:

Skynsamleg uppsetning skjala. Grunnreglur sem borga sig strax: aldrei blanda saman innslegnum tölum og formúlum í sama reit, setja allar breytur í eigin innsláttarreiti og skilja formúlurnar eftir ósnertar. Einnig litamerking innsláttarreita, skírðir reitir, forsnið talna með Custom sniði og hvernig mínustölur eru dregnar fram svo skjalið verði læsilegt fyrir aðra en þann sem bjó það til.

Circular reference. Hvað þessi villuboð þýða, hvernig þau eru rakin með Trace Precedents og hvernig þau eru leiðrétt. Einnig hitt tilvikið, þegar hringtenging er nauðsynleg og ætluð, til dæmis í sjóðstreymisáætlun þar sem vaxtatekjur og handbært fé byggja hvort á öðru, og hvernig iterative calculations er þá stillt. Auk þess af hverju á að hafa slökkt á þeirri stillingu að öllu jöfnu.

Pivot töflur. Hvernig mikið magn gagna er dregið saman á skiljanlegan hátt, uppsetningin frá vali á gagnasvæði að fullbúinni töflu, hvernig Rows, Columns og Values raðast, síun eftir breytum, og af hverju framsetningin sjálf ræður miklu um hvort taflan sé læsileg.

Sannreynslureitir. Formúlur sem reikna ekkert út heldur staðfesta að tilteknar forsendur standist, til dæmis að eignir stemmi við skuldir og eigið fé. Hvernig þeir eru litaðir grænir og rauðir með skilyrtu forsniði, og hvernig aukastafir geta gefið ranga niðurstöðu og hvernig það er lagað með námundun.

Gerð tímalína. Hvernig verkefni er sett myndrænt fram með AND, IF og skilyrtu forsniði í stað þess að teikna það handvirkt. Í leiðinni er farið yfir dollaramerki í tilvísunum og hvenær á að festa dálk, línu eða hvort tveggja, sem er forsenda þess að formúlan virki þegar hún er afrituð yfir alla töfluna.

Að loknu námskeiði getur þú byggt upp Excel skjöl sem aðrir skilja, fundið og leiðrétt villur í eigin líkönum og notað Excel bæði til útreikninga og til myndrænnar framsetningar.

Lengd námskeiðs: 55 mín.

Kennari: Haukur Skúlason